G E M E I N S C H A F T       L E B E N       L E R N E N

News 2017

 

Backers Maria – de beste Platt­läserin vant Ähms­land

Van C. Migura, 04.05.2017

So Maria, vertell: Wat was dat för äin Geföihl, as du dienen Pries wunnen häest?

Ick häbb mi frait, klaor! – Fröiher häbb ick uck all mitmakt, man dor bün ick nich so wiet kaomen.

Wat hässt du dann wunnen?

Nu bi den Wettstried van’n Landkreis häbb ick äinen E-Book-Reader krägen. Dat is heller moi.

Protet ih inhuse uck noch Platt?

Bitken wall, mit miene Mauder un mienen Vader, man tüsken us Kinner äingtlicks nich, vlichte maol’n paor Sättkes.

Du kannst dat ja noch heller gaud, finne ick! Mössdest du dann för dienen Vördrag öndlick üben?

Dat göng. Thope mit miene Mauder häbb ick dat Dönken eerst up use Platt ümschräwen.

Wo büst du dann tau dien Dönken kaomen, wat hässt du di utsöcht?

Inhuse häbbt wi ne Sammlung van plattdütske Böiker. Un mien Dönken vant Jaohr hett, pass tau mien Öller: „De Führerschien“; dor könde ick mi gaud in versetten. Dat gaiht üm dat Wicht Annegret, däi ehren Führerschien maken will. Man dat wull eerst nich so recht klappen. – Taulesde häww säi dat aver doch schafft.

Wat segget dann diene Mitschöiler, dat du platt proten un läsen kannst?

De hebbt groten Respekt dorvör. Weckere seggten achternaoh, säi häen dat uck äis gerne versöcht.

Wat mennst du, Maria, is dat ant Ümkippen mit dat Ansäihen van de plattdütske Spraoke? Van väle Lüe, ampatt van de Städtkers, is säi ja lange minnachtet worn.

Wäit ick noch nich so genaau, mag vlichte wall wäen. Ick haope dat.

Maria, besten Dank för dütt Interview, un alet Gaude för dienen nächsten Wettstried van’n Bezirk Ossenbrügge!

 
NACH OBEN